Promosapad word uiteindelik geteer
Inwoners van Promosa, Mohadin en Ikageng is oorstelp van vreugde nadat padwerke aan die Promosapad amptelik op Woensdag, 2 Junie begin het.
Inwoners van Promosa, Mohadin en Ikageng is oorstelp van vreugde nadat padwerke aan die Promosapad amptelik op Woensdag, 2 Junie begin het. Drie ingange na hierdie woongebiede draai almal uit die Promosapad.
Vir meer as drie jaar moes hulle elke dag ‘n pad vol gate trotseer wat by plekke so onbegaanbaar was dat motoriste eerder langs die pad as daarop gery het.
Die padwerke is aan drie hoofkontrakteurs toegeken, nl. Godfrey Xhalabile, Tholo Tsa Kwena en Bathuse Construction. Volgens Xhalabile verskaf die projek nou ook werk aan vyf subkontrakteurs en sowat 30 werkers. Dié werknemers kom almal uit Wyk 11, 14, 17 en 6, sê Xhalabile. Volgens die kontrak wat hulle gesluit het, moet die padwerke binne vier maande voltooi wees, maar Xhalabile sê dat dit selfs vroeër kan wees, mits alles volgens plan verloop.
Intussen moet motoriste wat gereeld die Promosapad gebruik het nou die Ikagengpad en Chief Albert Luthuli rylaan (Dassierandpad) na Promosa gebruik om hulle bestemmings te bereik.
