Johan van Dijk: 10 April 1949 – 1 September 2021
Johan van Dijk, ‘n bekende oudinwoner van Potchefstroom, is in Mediclinic Worcester weens hartversaking dood nadat hy vir lank na Covid-19 herstel het.
Johan is in Ochten in Nederland gebore. Hy en sy gesin het vir byna 48 jaar in Potchefstroom gewoon waar hy as siviele ingenieur by BKS Ingelyf gewerk het. Hy het in 2014 afgetree en hy en sy vrou Lorrein het in Februarie vanjaar na Robertson verhuis.
Hy was vir 35 jaar lid van die Potchefstroomse Mannekoor en was baie betrokke in die Gereformeerde Kerk, eers in die Gereformeerde Kerk Potchefstroom-Oos en daarna in die Gereformeerde Kerk, Die Bult. Hy was verder ‘n kranige rolbalspeler en het aan verskeie plaaslike toernooie deelgeneem.
Johan het dit geniet om lang ente te gaan stap en het graag die land en die wêreld saam met sy gesin verken. Hy was ‘n betrokke pa, ‘n geliefde oupa en ‘n besondere mens wat almal met respek behandel het. Hy sal onthou word vir sy gemoedelikheid, diep geloof, lojaliteit, geduld en standvastigheid. Hy word oorleef deur sy vrou Lorrein (neé Deysel), twee dogters, Lynette en Ilse, skoonseuns Hannes en Jan en drie kleinkinders, Lourens, René en Ila.
