‘n Waterlek in die teerpad oorkant Peter Mokabastraat 233 het die afgelope paar weke groot slaggate in die pad veroorsaak. Die gevolg hiervan is dat inwoners sukkel om uit hulle erwe te ry sonder om hul bande te beskadig.
Mnr. Ettienne Pretorius noem dat hierdie slaggat direk voor sy oprit dit moeilik maak om daagliks in en uit sy erf te ry sonder om sy bande te beskadig.
“Dit is baie frustrerend. Ek het hierdie waterlek en slaggat al op die Requestor App gerapporteer, maar die munisipaliteit kom net nie uit om dit reg te maak nie. Die slaggate maak dit ook vir motoriste amper onmoontlik om hier te ry, omdat hulle vir die gate moet uitswaai of wag vir verkeer. Dit veroorsaak dan opeenhopings in hierdie besige straat,” vertel Pretorius.
Toe die Herald Dinsdag, 8 Februarie foto’s van die slaggat en waterlek gaan neem het, was daar ten minste 10 motors wat in ‘n kwessie van twee minute die slaggate moes vermy. Met die groot volumes verkeer op hierdie pad is die kans groot dat hierdie slaggat net sal vergroot as dit nie spoedig herstel word nie.
Volgens DA wyksraadslid, Heinricha Hodgson, is hierdie waterlek en slaggat al telkemale deur verskeie mense aan die munisipaliteit gerapporteer.
* Die munisipaliteit se werkers het teen Woensdag (9 Februarie) omstreeks 14:30 met herstelwerk begin.
