‘n Huisbrand by Westerhof Woonstelle in Beyers Naudelaan 153 het verlede Woensdagaand, 11 Mei verwoesting gesaai.
Die brand het drie gesinne wat op die perseel gewoon het, direk geraak aangesien meestal van hulle besittings in die vlammehel verwoes is.
Daar is niemand tydens die brand beseer nie, maar die gedeelte van die woonstelle waar die gesinne gebly het, is nou onbewoonbaar.
Sedert die brand is hierdie gesinne, wat sewe kinders van verskillende ouderdomme insluit, die afgelope week op tydelike plekke gehuisves. Die behoefte bestaan steeds dat hierdie gesinne alternatiewe behuising vind.
NG Welsyn Potchefstroom in Maherrystraat 28 sal die sentrale punt wees waar die gemeenskap donasies kan aflewer.
Marizanne Grobbelaar, skakelbeampte van NG Welsyn, beklemtoon dat hierdie gesinne onder meer items soos kruideniers, toiletware, beddegoed en klere benodig.
“Die gemeenskap kan ook monetêre donasies of geskenkbewyse van kruidenierswinkels gee om hierdie gesinne by te staan,” noem sy.
Die kinders se ouderdomme vir klere wissel van 16-17 jaar (seuns), 8-9 jaar, 9-10 jaar (dogters) 4-5 jaar (seuns en dogters) sowel as ‘n 9-12 maande oue baba. Die baba benodig ook formulemelk.
Lede van die gemeenskap kan donasies direk by NG Welsyn in Maherrystraat aflewer.
Die gemeenskap kan ook ‘n geldelike donasie maak en in die volgende rekening inbetaal:
NG Welfare Potchefstroom
Bank: ABSA
Rekeningnommer: 6804 40972
Verwysing: Brand
Volgens Noordwes polisiewoordvoerder, kol. Adele Myburgh, is daar nog nie ‘n amptelike oorsaak vir die brand vasgestel nie.
Sowat ‘n week na die brand is daar steeds mense wat sonder amptelike goedkeuring op die perseel bly. Die prokureur wat namens die eienaar optree, het voor die brand alreeds ‘n aansoek om uitsetting van stapel gestuur. Dit is met betrekking tot die onwettige inwoners in terme van die wet op die Voorkoming van Onwettige Uitsetting en Onregmatige Besetting van Grond, (Wet 19 van 1998).
