Daar was groot fees gehou toe Huis Eikelaan se oudste inwoner, mev. Elsie Kok, haar 99ste verjaarsdag op Saterdag, 9 Julie gevier het.
Huis Eikelaan het vir smullekker eetgoed gesorg sowel as lekker warm tee wat hierdie geliefde inwoner saam met haar familie en mede-inwoners alreeds op Vrydag, 8 Julie kon geniet.
As ‘n mens na Ouma Elsie kyk sal jy nie sommer dink dat sy al 99 jare agter haar blad het nie. Toe sy hoor dat Huis Eikelaan ‘n spesiale verjaarsdagpartyjie vir haar gereël het en sy die mooi tafelversierings sien was sy sprakeloos.
“Ek is so dankbaar en sommer oorweldig,” noem sy toe sy geskenke van Huis Eikelaan en haar familie ontvang het.
Foto’s: Wouter Pienaar
Daar was pure blydskap en dankbaarheid in Ouma Elsie se oë met al haar geliefdes om haar op die dag. Dit het drie kleinkinders, 3 agterkleinkinders, ‘n seun, skoondogter en skoonseun ingesluit.
Ouma Elsie woon al sedert November 2021 by Huis Eikelaan en die afgelope 15 jaar is sy ‘n gevestigde Potchefstromer.
Haar oorlede man, Johan, was ‘n polisieman en het in verskeie dele van Suid-Afrika gewerk. Sodoende het Elsie al in klomp plekke in haar lewe gebly.
Nou hou Ouma Elsie haar daagliks besig met haar breiwerk, iets wat sy nog baie geniet aangesien sy daarvan hou om met haar hande te werk.
“Ek brei nog en maak graag komberse vir behoeftiges. Genade van Bo, sowel as my familie se ondersteuning dra my elke dag,” vertel sy met ‘n sprankel in haar oog.
