Molen Kórus se kamerkoorfees beloof om ‘n groot treffer te wees
Die kore waarna die gehoor kan uitsien sluit die Ricordo Ensemble van Pretoria in wat hoofsaaklik uit oud-Puk koorlede bestaan, asook die Vocalise Fellowship Choir van Pretoria onder leiding van Wihan Rossouw en die Rheinberger Kamerkoor uit die Oosrand, onder leiding van Gert Pottas.
Na ‘n hiatus van drie jaar, bied Molen Kórus hierdie naweek weer ‘n kamerkoorfees in Potchefstroom aan!
Dié plaaslike kamerkoor, wat na Potchefstroom se gewilde Molenstraat vernoem is, bied Saterdagaand, 12 November ‘n konsert aan waarin Molen Kórus saam met drie Gautengse kore te sien sal wees.
Die kore waarna die gehoor kan uitsien sluit die Ricordo Ensemble van Pretoria in wat hoofsaaklik uit oud-Puk koorlede bestaan, asook die Vocalise Fellowship Choir van Pretoria onder leiding van Wihan Rossouw en die Rheinberger Kamerkoor uit die Oosrand, onder leiding van Gert Pottas.
Die kamerkoorfees beloof om iets vir elke koorliefhebber te bied met ‘n veelsydige program. Elke koor het ‘n unieke klank, asook fokusarea vir hul repertoire, en die gehoor kan dus klassieke werke, Kersmusiek en ook meer kontemporêre werke te wagte wees.
Dit is nie elke dag dat mens die geleentheid kry om soveel plaaslike kore van uitstaande gehalte op een verhoog te sien nie en Molen Kórus nooi elke Potchefstromer uit om hierdie fees te kom bywoon.
Die konsert vind 12 November om 18:30 by die NG Kerk Potchefstroom-Noord (Dwarsstraat 21) plaas en kaartjies kos R80 per persoon. Kaartjies is aanlyn by Quicket sowel as by die deur beskikbaar.
Molen Kórus bied ook weer 16 November oudisies vir nuwe lede aan.
Meer inligting volg binnekort. Hou gerus die koor se Instagram-en Facebook blaaie by @molenkorus dop, of stuur ‘n e-pos na molenkorus@gmail.com vir verdere navrae.
