‘n Rioollek in die Heuwelsig-kompleks in Rooibokstraat wat ongeveer twee weke geduur het, is uiteindelik herstel.

Debbie Kleynhans, inwoner en kompleksbestuurder in Heuwelsig, het die rioollek aan verskeie mense gerapporteer, waarna ‘n span uitgestuur is om die lek te kom regmaak. Die span het gerapporteer dat dit skoon water is wat lek, en het weer gery.

“Die riool loop oor ons plaveisel en die inwoners moet deur die riool ry na hulle eiendomme toe. Die reuk kan al deur die hele kompleks geruik word. Die kinders kan glad nie naby die sirkel kom as gevolg van die riool en reuk nie,” het ‘n ontstelde Kleynhans verlede week opgemerk.

Kleynhans het besluit om die saak verder te vat en het die rioollek aan Anné Van Onselen, die betrokke wyksraadslid, gerapporteer. Van Onselen het aan die werk gespring en die lek dadelik aan Johan Erasmus en Pedro Rankin van die Wykskomitee gerapporteer.

“Hulle hanteer water en riool probleme saam met my. Ek’t dit ook vir ‘n munisipale amptenaar aangestuur vir aandag,” sê Van Onselen.

Van Onselen is Woensdagmiddag, 31 Mei, self Heuwelsig-kompleks toe om ondersoek in te stel.

“Dit was steeds nie uitgesorteer nie,” sê Van Onselen. “Dis vir my ‘n frustrasie wanneer daar nie aandag aan ‘n probleem gegee word nie. Verál riool wat ‘n gesondheidsrisiko inhou.”

Van Onselen het Saterdag, 3 Junie weer uitgereik na die munisipaliteit wat toegesien het dat die rioollek dadelik herstel word.