Potchefstroom Animal Welfare Society (PAWS) het ‘n klag van dieremishandeling aanhangig gemaak nadat drie dooie honde op die perseel van ‘n huis in Francoisstraat gevind is.

PAWS het Woensdag, 6 Desember klagtes van dieremishandeling ontvang en gaan ondersoek instel. Bure het ‘n erge stank geruik en opgemerk dat dooie honde in die erf gelê het. Drie babahonde is in ‘n swartsak op die perseel gevind.

Die vermoede is dat die honde weens ‘n gebrek aan voeding gesterf het. Daar is tans nog vier honde op die perseel met PAWS wat daagliks ondersoek instel om die honde se welstand te monitor.

Volgens Theo Koekemoer, bestuurder van PAWS, word daar toegesien dat die die honde daagliks kos en water kry.

“Ons het die eienaar genader om die honde vir sterilisasie te bring, maar dit het nog nie gebeur nie. Ons het aansoek gedoen vir ‘n hofbevel om die honde van die perseel te verwyder, maar wag nog dat dit toegestaan word.”

Volgens NW polisiewoordvoerder, kapt Aafje Botma, is daar nog niemand amptelik aangekla nie, maar sy het bevestig dat ‘n saak oopgemaak is.