Die 21-jarige man wat Woensdag in Potchefstroom in hegtenis geneem is in verband met ’n beweerde huisroof en verkragting, het Vrydag 11 September in die Potchefstroom-landdroshof verskyn.

Die verdagte staan tereg op aanklagte van huisroof en verkragting nadat hy na bewering op 30 Augustus toegang tot ’n woning in Potchefstroom verkry het en ’n 52-jarige vrou aangeval het.

Soos vroeër berig, is die verdagte ná ’n ondersoek deur onder meer Potchefstroomse speurders, Misdaadintelligensie en die Plaaslike Kriminele Rekordsentrum geïdentifiseer en opgespoor.

Hy is Woensdagmiddag 9 September by ’n bekende landgoed in Potchefstroom in hegtenis geneem, waar hy glo as ’n teëlaar gewerk het.

Die saak is Vrydag in die Potchefstroom-landdroshof uitgestel nadat die verdagte om regshulp aansoek gedoen het. Die beskuldigde het nog nie formeel gepleit nie.

Hy sal na verwagting weer op Woensdag 16 September in die hof verskyn. Hy bly intussen in aanhouding.

Die polisie se ondersoek na die voorval duur voort.