Die Bright Future Educational Organisation het onlangs ’n welkome hupstoot ontvang toe Vescotech rekenaars aan die organisasie geskenk het.

Die geregistreerde NPO, wat daarop fokus om ’n verskil in die gemeenskap te maak, het die geleentheid gebruik om Estelle en Corne Verwey opreg te bedank vir hul ondersteuning en bydrae.

Die organisasie bied leerprogramme aan jongmense en minderbevoorregtes en fokus onder meer op kwessies soos MIV/Vigs, tienerswangerskappe, die gevare van misdaad en dwelmmisbruik.

Een van die belangrike projekte van Bright Future Educational Organisation is om rekenaarvaardighede aan kinders te bied wat nie noodwendig die geleentheid het om verder te studeer of toegang tot tegnologie te hê nie.

Die nuwe rekenaars sal volgens die organisasie ’n waardevolle rol speel om dié programme verder uit te brei en meer jongmense met noodsaaklike vaardighede toe te rus.

Die organisasie doen terselfdertyd ’n beroep op individue en besighede wat graag ’n verskil wil maak om rekenaars of finansiële skenkings te oorweeg.

“Ons help om ’n verskil in ons gemeenskap te maak,” het die organisasie gesê en bygevoeg dat enige ondersteuning baie waardeer sal word.

Bright Future Educational Organisation bedank Vescotech, Estelle en Corne Verwey vir hul ondersteuning en vir die geleentheid om deur middel van tegnologie nuwe moontlikhede vir jongmense te skep.