’n Werknemer van die Noordwes Departement van Landbou het Dinsdag, 31 Maart, in die Potchefstroom-landdroshof verskyn nadat hy in hegtenis geneem is op aanklagte van korrupsie.

Seabelo Lebitse (43) staan tereg op drie aanklagte van korrupsie nadat hy na bewering geld van ’n diensverskaffer gevra het in ruil vir hulp met ’n tender.

Volgens Lt. kol. Tinyiko Mathebula, woordvoerder van die Valke, is Lebitse Dinsdagoggend deur die Valke se Ernstige Korrupsie-ondersoekeenheid in Klerksdorp in hegtenis geneem ná ’n ondersoek na die beweerde onreëlmatighede.

Die ondersoek spruit uit ’n voorval in Oktober 2020 toe die beskuldigde glo ’n diensverskaffer genader het wat dokumente ingedien het om vir ’n tender by die Noordwes Departement van Landbou te bie. Lebitse het glo aangebied om te help om die tender te fasiliteer op voorwaarde dat daar na hom “omgesien” word.

“Ondersoeke het aan die lig gebring dat die diensverskaffer R10 000 aan die beskuldigde betaal het vir die aankoop van bande vir sy voertuig,” het Mathebula gesê.

Daar is verder vasgestel dat die diensverskaffer ook op twee ander geleenthede betalings van R2 000 en R1 000 aan Lebitse gemaak het.

Volgens Mathebula het die diensverskaffer daarna ’n diensvlakooreenkoms met die departement aangegaan vir die bou van ’n tonnel en die installering van visdamme.

Lebitse is ná die ondersoek in hegtenis geneem en formeel van drie aanklagte van korrupsie aangekla. Hy is tydens sy hofverskyning op borgtog van R5 000 vrygelaat.

Die saak is tot 7 Mei uitgestel wanneer dit in die Gespesialiseerde Handelsmisdaadhof in Klerksdorp sal voortgaan.