Potchefstroom is die afgelope naweek deur twee afsonderlike motorongelukke geskud, met nooddienste wat vinnig moes reageer om tonele te stabiliseer en pasiënte by te staan.

Die eerste voorval het vroegoggend op Sondag, 17 Mei omstreeks 05:46 in Albert Luthulirylaan plaasgevind. Volgens inligting het ’n grys Toyota-bakkie beheer verloor terwyl dit vanaf die brug se rigting genader het. Die voertuig het daarna deur die muur van Hike & Takeaways gebars en aansienlike skade veroorsaak.

Nooddienste, insluitend ER24 en verskeie insleepdienste, was vinnig op die toneel om hulp te verleen en die situasie te bestuur.

In ’n tweede, afsonderlike voorval het ’n botsing tussen twee voertuie Saterdagaand, 16 Mei by die kruising van Strydom- en Paryslaan plaasgevind. Besonderhede oor die oorsaak van dié ongeluk bly beperk, maar nooddienste het onmiddellik opgetree om seker te maak dat alle beseerdes die nodige mediese behandeling ontvang.

Rolspelers wat by beide tonele betrokke was, sluit in Mooirivier Beskerming se nooddiens, NWU TU01 Response, ER24, Potchefstroom Brandweer, SAPD, asook insleepdienste wat bystand gebied het.

Hul vinnige optrede en samewerking het verseker dat die situasies doeltreffend hanteer is en dat pasiënte die beste moontlike sorg ontvang het.

Kyk na die videos hier: