‘n Volkies kolfineenstorting en ‘n onoorwonne 62 van Gimmies se veelsydige Marco Jansen was die twee groot besprekingspunte van vandag se Noordwes u.19 Superliga-stryd tussen Volkies en Gimmies op die Gimmies Oval wat die tuisspan met 5 paaltjies gewen het.

Jansen se 62 (101) was dalk nie oogeenlopend vinnig nie, maar hy was die anker wat Gimmies na ‘n oorwinning gelei het. Matthew Haupt het ook hier met ‘n blitsige 49 (25) goeie bystand gelewer.

Volkies het ondanks ‘n 90 lopie openingsvenootskap tussen Vincent Viljoen (52) en Louis van Schalkwyk (47) tot 185 almal uit geval , met geen ander kolwer wat meer as 20 lopies kon slaan nie. Hier was Vernon Charlund (3/28) en Francois Viviers (2/14) van die uitblinkers met die bal. Die Jansen tweeling, Marco (1/18) en Duan (2/18) was ook ekonomies met hulle linkerarm-boulwerk.

Volkies het hul beste probeer om in die wedstryd terug te kom, maar moes toekyk hoe Jansen sy span na ‘n oorwinning stuur. Volkies se beste boulers was André Taljaard met 2/19 van 10 boulberte en Van Schalkwyk met 2/29 van 10 boulbeurte.

Lees meer breedvoerig oor hierdie wedstryd sowel as die ander wedstryde tussen Gimmies en Volkies wat plaasgevind het in komende week se Herald.