Vir dekades is die Gimmie-Volkie Classic Clash wedstryd een vir die boeke of dit nou op die Fanie du Toit Sportgronde, Volkskool se tuisveld of die Mooivallei Sportterrein plaasgevind het.

In 2002 het Gimmies se eerste span vir Volkies met 26-17 in die hierdie groot tweestryd geklop. Gimmies se heelagter en onderkaptein, Marius van der Merwe, was een van die groot uitblinkers en het met ‘n drie sy span met 16-6 teen halftyd te laat voorloop.

Die huidige eerstespan krieketafrigter van Volkies, Andries Huisamen, het toe vir Gimmies op losskakel in hierdie wedstryd uitgedraf. Huisamen het in hierdie wedstryd 16 punte met sy skopvoet vir Gimmies besorg.

Van der Merwe het sy en sy span se tweede drie in die tweede helfte gedruk om Volkies se doppie te klink. Dit nadat Volkies vroeër teruggeveg het om die voortou te neem met Lourens Brits en Jasper Janse van Rensburg wat puik wedstryde beleef het.

Op die netbal en hokkievelde was sake ook baie naby met Volkies en Gimmies wat agt oorwinnings elk gedeel het.