Retief Esterhuysen, ‘n graad 11-leerder aan Hoërskool Ferdinand Postma, het vandeesweek aan die SA Senior Nasionale Swemkampioenskappe in Port Elizabeth deelgeneem en twee silwermedaljes verower.

Hy het silwer in die 100m en 200m vlinderslagitems losgeslaan en ook sy eie persoonlike rekord in albei hierdie items, en al die ander items waaraan hy deelgeneem het, verbeter.

Om die kroon op ‘n puik seisoen te span, het hy ook in Maart aan die SA Junior Nasionale Kampioenskappe deelgeneem en daar goud in die 100m vlinderslagitem verower.

Die NWU Swemklub swemmer het al verskeie kere aan die junior nasionale kompetisie deelgeneem, maar dit is die eerste jaar wat hy gekwalifiseer het om aan die senior kampioenskappe deel te neem.