Op 22-jarige ouderdom het die Potchefstroomse skeidsregter, Hanru van Rooyen, geskiedenis gemaak as die jongste skeidsregter wat ‘n Neserliga-finaal blaas.

Dié eindstryd tussen Potch Dorp en Ikageng Rugby Development Club op 19 Junie vanjaar was ‘n oomblik wat die talentvolle skeidsregter en voormalige leerder van die Hoër Volkskool Potchefstroom nie sal vergeet nie, en wys hoe Hanru se rugbyloopbaan ‘n mooi kringloop gevorm het.

Agt jaar gelede het Hanru se skeidsregtersloopbaan by Potch Dorp begin nadat hy vroeër as jong seun talle klubwedstryde van die kantlyn af gekyk het terwyl sy pa, Henry, Potch Dorp afgerig het.

“Dit was een van die lekkerste en mees opwindende eindstryde wat ek geblaas het omdat dit ‘n eindstryd vol hardlooprugby was,” noem Hanru.

“Ek het langs die veld by klubrugby grootgeword, so vir my is dit spesiaal om na agt jaar van skeidsregting die man in die middel te kon wees tydens die Neserfinaal. Dit was ongelooflik toe ek die oproep kry om die Neser-finaal te kon blaas en my naam in die geskiedenisboeke te kon skryf,” vertel hy opgewonde oor hierdie groot oomblik.

Hanru is tans op SA Rugby se amateurpaneel van skeidsregters en het die afgelope paar jaar groot indruk gemaak tydens top nasionale weke soos die o.16 Grant Khomo en o.18 Akademieweek.

Hy was ook al langs die kantlyn as assistent skeidsregter by die Varsitybeker betrokke. Sy doelwit-gebaseerde benadering tot skeidsregting gee vir hom die geleentheid om sy spel te evalueer en aan sekere aspekte te werk. Volgens Hanru leer hy altyd iets na elke wedstryd wat hy in sy spreekwoordelike rugsak kan bêre vir die volgende 80 minute in die middel.

“Elke liewe wedstryd leer ek iets saam met die twee vlagmanne. Daar is verskillende dinge wat ‘n mens leer en saam met jou in jou rugsak sit vir die volgende wedstryd.

Daar is verskillende aspekte in die wedstryd waarna ek moet kyk. Ek kies gewoonlik drie aspekte waarna ek wil kyk en dan evalueer ek myself rakende daardie drie doelwitte. Dit kan byvoorbeeld die spasie, skrum en losgemaal wees en dan sal ek regmerke langs die doelwitte sit as ek geslaag het met bykomende kommentaar. As ek nie slaag nie, sal ek na die video-materiaal kyk en deurgaan om te kyk waar ek kan verbeter,” verduidelik hy sy modus operandi.

Hanru was op skool een van die opwindendste losskakels in sy ouderdomsgroep en is tweede op die punteleer vir meeste punte (70) wat in een Cravenweek aangeteken is. Steeds lê sy groot passie by skeidsregting en om rugby daardeur voluit te geniet.

“Wat skeidsregting lekker maak is dat jy heeltyd by ‘n verskeidenheid tipes rugby van skool tot professionele vlak betrokke kan wees. Die lekkerste aspekte is om te sien hoe rugbyspelers ontwikkel, om by ‘n verskeidenheid mense te leer en ook te kan reis en verskillende kulture en lande te ervaar. Om eerstehands met iemand soos Jaco Peyper (SA skeidsregter) te werk gee ‘n mens ‘n kans om by hulle te leer en toe te pas in jou skeidsregting en die lewe.” Hierdie huidige NWU student wat sy honneurs in besigheidsbestuur doen, noem ook dat fiksheid een van die uitdagendste aspekte van skeidsregting is.

“Die oefeninge is baie uitdagend. Jy moet gereeld kan hardloop en jy moet so fiks wees sodat jy jou beste kan gee vir 80 minute op die veld,” beaam hy.

In die toekoms wil Hanru graag die nasionale paneel haal en dan na die Elite-paneel van skeidsregters in Suid-Afrika opskuif.

“Ek steun op die Here se tydsberekening wanneer dit die regte tyd is vir my om op te beweeg,” noem hy. Hierdie 22-jarige deel graag die rol wat sy pa Henry, in sy loopbaan van die begin af tot nou toe, steeds speel.

“Die rol wat my pa speel is ongelooflik groot. Hy is altyd die eerste persoon wat my kalm hou voor ‘n wedstryd en tydens halftyd sal hy vir my sê waarop ek kan bou en verbeter. Aan die einde van die wedstryd sal hy my opbou, al dink ek dat ek ‘n paar foute gemaak het.

“Die opbouende kritiek laat my altyd beter voel. Hy ondersteun my ook altyd langs die veld en dit sal nie vervul kan word deur enige iemand anders nie.”