Die NWU se Varsity Krieketspan het ‘n begeesterde CUT span vanmiddag met vyf lopies in Varsity Krieket half-eindstryd geklop om hulle plek in Woensdag (5 Oktober) se eindstryd teen Maties te bespreek.
Hierdie eindstryd beloof om ‘n titaniese kragmeting tussen die enigste twee onoorwonne spanne in die toernooi te wees.
Foto’s: Christiaan en Catherine Kotze/ASEM Engage
Die NWU se JP King, Eben Botha en kaptein, Chris Britz, is vanjaar van die voorste lopiemakers in die toernooi, terwyl Caleb Seleka en Hardus Coetzer albei met die bal skitter.
Vir Maties sal die snelbouler, Phillip Kleynhans, die die draaier, Benjamin Ward, die troefkaarte wees. Ward het juis teen Tukkies in die ander halfeindstryd vandag ‘n driekuns (en vier paaltjies) in een boulbuert behaal om vir Tukkies vir slegs 76 uit te boul.
Maties klop sodoende vir Tukkies gemaklik met 8 paaltjies. Die Stellenbosch span maak ook staat op ‘n sterk kolforde met George van Heerden, Ruan Terblanche en Michael Copeland wat top kolwers is.
Die NWU het vandag teen CUT gelyk of hulle ‘n gemaklike oorwinning sou behaal maar ‘n kragbeurt (powerplay over) het die Potchefstromers 32 lopies gekos, aangesien elke lopie verdubbel word. Sodoende het CUT se Delano Williams met 26* (9) amper die oorwinning uit die NWU se hande geneem.
Die NWU se helde met die kolf was Heinrigh Pieterse 48 (41) en Taheer Isaacs 28 (22) in hulle groottotaal van 157/6 na 20 boulbeurte.
Dit was op die ou einde deurslaggewend aangesien NWU se boulers toe met genoeg lopies kon speel om CUT in ‘n blik te druk.
*Woensdag (5 Oktober) se eindstryd vind om 12:00 op die Tuks-Oval plaas.
