Villagers Manskoshuis is die NWU Koshuiskrieketkampioene vir ‘n vierde keer nadat hulle vir Veritas Manskoshuis in die finaal op die J.B. Marks Ovaal in Potchefstroom met 4 lopies in ‘n naelbytstryd geklop het.
Villagers het in hierdie 10-beurt wedstryd wat op Woensdag, 29 Maart plaasgevind het, met beide kolf en bal geskitter in ‘n top spanpoging. Villagers het hul kwartfinaal teen Caput gewen en toe vir Patria in die semi-finaal om ‘n plek in die finaal teen Veritas te bespreek.
Foto’s: Bertus le Roux
Villagers kolf eerste nadat Veritas die loot wen en besluit het om eerste te boul.
Villagers teken 121/8 aan met Lee Mokoena (27 van 30 balle) wat ‘n ankerrol speel en Kyle Welman (23* van 13 balle) wat met twee viere en ‘n ses die beurt op ‘n hoogtepunt afsluit.
Dit was ‘n top terugvegpoging van die middelorde nadat Veritas se boulers vroeër vir hulle opponente op 33/4 gelaat het.
Luan Bischoff (2/19) en Charl Naude (2/30) was Veritas se top boulers op die dag.
Villagers se Liam Anderson (2/19) het vroeg skade gemaak om Veritas in hulle jaagtog op 6/2 te laat. Veritas se Dewald Potgieter (40 van 27 balle) en Waldo Meintjies (30 van 26 balle) het wel amper die wedstryd in hulle guns geswaai.
‘n Draaipunt in die wedstryd is toe Meintjies danksy flink werk van Anderson en Villagers se paaltjiewagter en kaptein, Lohard Janse van Rensburg, uitgehardloop is.
Met die laaste beurt Veritas nog 21 lopies vir ‘n oorwinning benodig. Met die laaste bal wat vir ‘n foutbal gegaan het, was die spanning ook nog verder verhoog. Op die ou einde kon Villagers koelkop bly om die wen deur te trek.
Matthys van Heerden, Villagers se hoofafrigter, noem dat sy span goed voorberei was en ‘n sterk broederskap gevorm het.
“Die manne het koelkop gebly en die totaal wat ek vir hulle gestel het behaal. Hulle het ook met groot gees uitgegaan om te boul en hard gewerk. Ek wil net ook die Sleepkoshuise, sowel as Villagers se Bouspan en Kampstoelkommitee bedank wat tydens Jool kom ondersteun het,” noem Van Heerden wat ook vir Villagers na ‘n sege in 2020 afgerig het.
Speler van die wedstryd: Kyle Welman
Villagers Kaptein: Lohard Janse van Rensburg
Villagers onder-kaptein: Renier Bosman
Villagers afrigter: Matthys van Heerden
Villagers hulpafrigter: Jean Du Plessis
