OPINIE: R900m – Gaan R’fontein ook ‘n stuk van die pastei kry?
Lojale belastingbetaler en sake-eienaar wonder of die Randfontein Stadsraad enige deel van die meer as R900 miljoen gaan bestee om die dorp op te gradeer.
• Frans le Grange skryf:
Dagsê Randfontein
Met betrekking tot die R900 miljoen wat begroot is om plaaslike stadsrade op te gradeer, het ek die volgende opmerkings:
Die president van Suid-Afrika het sy gewone openingstoespraak gelewer. Almal was uitgedos in die Kaapstadse raadsaal, aangesien die parlementêre gebou – wat steeds nie ten volle herstel is nie nadat ‘n brandstigter daarin geslaag het om die sekuriteit te omseil en dit aan die brand te steek – onbruikbaar bly. (Wat kos daardie herstelwerk nou al?)
Die president het gespog dat Suid-Afrika die grootste verskaffer van kanabis gaan word. Maar is dit regtig iets om op trots te wees?
Ek lei af dat ons toekoms vol verdowingsmiddels gaan wees.Daar is ook gespog dat R900 miljoen begroot is om plaaslike stadsrade op te gradeer. Ironies genoeg is baie infrastruktuur wat 40 jaar gelede gewerk het, intussen afgebreek.
Nou word belastingbetalers se geld gebruik om te probeer herbou wat reeds in 1993 gewerk het. Gaan Randfontein se stadsraad ook ‘n deel hiervan kry? Hoe lank gaan dit neem? En is R900 miljoen regtig genoeg?
Ek daag die parlement uit om aan ons, as belastingbetalers, duidelik te sê wanneer en hoe hierdie opgraderings gedoen gaan word. Neem byvoorbeeld Middelvlei, Finsbury en Kocksoord. Ongeveer 25 eenhede met gemiddeld 32.2 slaapkamereenhede het in totaal sowat 800 tweeslaapkamerwoonstelle gehad – maar nou is daar net fondasies en mure oor.
Al die vensters, deure, elektrisiteit, waterpype en baddens is gesteel of vernietig. Dit is ‘n skandelike vermorsing en verduistering van geld.Intussen word daar nuwe huise in Zimbabwe en Mosambiek gebou met my en jou belastinggeld. Ek wil graag ‘n skriftelike antwoord ontvang oor hoe Randfontein se distriksraad herstel gaan word. Kan Noordweg en ons sportgronde asseblief dringend aandag kry?
Ek het ook pas gehoor dat ons nou waterbeperkings het. Ons het egter reeds daagliks ‘n waterkrisis. Is hierdie beperkings as gevolg van die stadsraad se onvermoë om sy finansiële verpligtinge aan Rand Water na te kom?
Ons damme is immers besig om vol te raak ná die onlangse reënval.
