BRIEF: Randfontein-vrou soek haar ware familie
’n Randfontein-vrou smeek vir hulp om haar Portugese familie te vind en uiteindelik antwoorde oor haar identiteit te kry.
• Charmaine Bailey skryf:
Ek is in Randfontein op 18 Februarie 1967 – moontlik 1968 – gebore. Vanaf drie dae oud is ek in die sorg geplaas van ’n vrou met dieselfde van. Toe ek nege jaar oud was, het ’n man by ons huishouding aangesluit as my stiefpa.
Hierdie vrou is in Mei 1987 oorlede, en my stiefpa in September 1999. Op 16-jarige ouderdom het ek by ’n leerder van Randfontein Sekondêr in Toekomsrus gehoor dat iemand anders my biologiese ma is.
Eers toe ek omtrent 25 jaar oud was, het ek probeer om ’n verhouding met my biologiese ma te bou – deels om uit te vind wie my pa kon wees. Tot dusver weet ek steeds niks nie; nie eens ’n naam of van nie. Wat ek wel weet ná ’n DNA-toets, is dat my pa Portugees was, afkomstig van Madeira, Portugal.
As daar enigiemand is wat dalk iets weet van Portugese families wat in die 1960s in Randfontein of Krugersdorp kom vestig het, sal ek dit opreg waardeer.
Om nie te weet waar jy vandaan kom nie, dra swaar op ’n mens se gemoed. Elke kind verdien die waarheid – maak nie saak hoe jonk of oud jy is nie. My soektog is nie vir finansiële gewin nie, maar vir vrede, identiteit en innerlike rus vir my én my familie.
As iemand vermoed dat ons dalk familie kan wees, is ek bereid om vir die DNA-toets te betaal.
Kontak asseblief ons plaaslike koerant, die Randfontein Herald, met enige inligting.
