Laerskool Rapportryer se skoolsaal was volgepak met trotse ouers tydens ‘n spesiale geleentheid vir die nuwe groep Graad 1’s.
Op Maandag, 31 Januarie is die skool se groentjies ingehuldig tydens ‘n spoggerige seremonie waartydens elke leerder die klok kon lui en ‘n sertifikaat van skoolhoof Andrè Kruger ontvang.
Volgens skoolwoordvoerder Esme Botha is die skool se nuwe gelukbringer ook bekendgestel, en Rappiesaurus het ook sommer die klok gelui en sy sertifikaat ontvang.
Esme het vertel dat die opening waargeneem is deur juffrou Celeste Wentzel wat uit Jeremia 29:11 voorgelees het.
“Ek weet wat ek vir julle beplan het, sê die Here: Ek wil dat julle hoop vir die toekoms moet hê.”
Celeste het vertel dat daar hoop geplant moet word in Graad 1’s se harte want hulle is ons toekoms.
Ons is baie trots op elke Graad 1-leerder en ons kan nie wag om saam met hulle en hul ouers ‘n hoopvolle toekoms te bou nie,” het skoolhoof Andrè Kruger tydens die spoggeleentheid gesê.
