Leier en legende John Griffiths sterf op 98
Die dood van voormalige burgemeester en Vryman John Griffiths (98) het die gemeenskap diep geraak, met baie inwoners en naastes wat treur oor die nalatenskap wat hy in Randfontein agtergelaat het.
Die Randfontein-gemeenskap is in rou oor die verlies van voormalige burgemeester, politieke rolmodel en pa-figuur, John Griffiths, wat in die ouderdom van 98 oorlede is.
Sy seun, Miles Griffiths, het bevestig dat John aan natuurlike oorsake oorlede is.
“My pa se politieke nalatenskap het in 1962 begin toe hy tot die Stadsraad verkies is om Homelake te verteenwoordig. Daardie jaar het ’n tornado die sportsgronde in Greenhills erg beskadig, en my pa was die hoofaanvoerder agter die herstelwerk,” het Miles gesê.
Hy het bygevoeg dat John nie net betrokke was by die opgradering van die dorp se infrastruktuur nie, maar ook vir verskeie jare in die dorpsraad se bestuurskomitee gedien het – meestal as voorsitter.
Gedurende dié tyd het hy twee keer as burgemeester gedien. Hy is later vereer as ’n Vryman van Randfontein – ’n eerbewys van die Randfontein-raad vir sy uitsonderlike diens aan die dorp. In 1970 is hy verkies tot die Provinsiale Raad van Transvaal en in 1981 het hy ’n lid van die Uitvoerende Komitee geword.
Volgens Miles laat sy pa ’n onmiskenbare nalatenskap agter – onder meer die krieketovaal wat na hom vernoem is.
John se begrafnis vind op 4 Julie om 11:00 plaas by die NG Gemeente Waverley in Pretoria.
Lees die Herald se uitgawe van 11 Julie vir die volledige berig.
