Die gees was hoog tydens Mapogo A Mathamaga se liefdadigheidsgholfdag wat onlangs by die Krugersdorp Gholfbaan aangebied is.

Altesaam 164 spelers het aan die dag deelgeneem. Volgens die organiseerder, Carike van der Merwe, het die geleentheid daarop gefokus om verhoudings tussen mense en plaaslike besighede te versterk, terwyl daar terselfdertyd iets positiefs vir die gemeenskap gedoen word.

LEES OOK: Randfontein first team crushes UJ in thriller

“Dit was ’n geleentheid om netwerke te versterk, nuwe verhoudings te vorm en plaaslike ondernemings blootstelling te gee. Deur samewerking en deelname het ons ook fondse en ondersteuning ingesamel om terug te ploeg in die gemeenskap en ’n verskil te maak waar dit nodig is,” het sy gesê.

Vir Carike was die hoogtepunt van die dag die funksie ná die gholf. Ondanks die lang dag van reën en koue weer het deelnemers steeds saamgestaan en die aand geniet.

“Die veiling was ’n groot sukses en het gewys hoe mense hul harte oopgemaak het om by te dra en ’n verskil te maak. Die ondersteuning, samehorigheid en vrygewigheid van almal het die dag werklik besonders gemaak.”

Die fondse wat tydens die dag ingesamel is, sal aan verskeie plaaslike organisasies geskenk word, insluitend skole in die Wes-Rand, ’n plaaslike kinderhuis en ’n voedingskema.

“Die gees op die dag was ongelooflik positief en opbouend. Almal het met entoesiasme deelgeneem en mekaar ondersteun. Mense het saam gelag, netwerke gebou en hul ondersteuning gewys, wat ’n warm en verwelkomende atmosfeer geskep het deur die hele dag en aand,” het sy afgesluit.