‘n 47-Jarige vrou van The Reeds, in Centurion, is Saterdagaand langs haar man in hul motor deur ‘n groep gewapende rowers doodgeskiet.

Volgens ‘n familiewoordvoerder het Susan (47) en haar man Nico (51) na die Phillips-kafee op die hoek van Panaroma-en Yelande straat gegaan om hout vir die braai te koop.

“Nico en Susan het reeds hout gekoop en in hulle motor geklim en begin weg ry toe hulle die groep mans sien. Die mans het agter die voertuig begin aan hardloop.

“Een van die mans het daarin geslaag om tot langs die motor te hardloop voordat hy ‘n skoot deur die venster aan die bestuurderskant geskiet het. Die koeël het Nico gemis maar Susan in die agterkop getref.”

Nico het met Susan na die Rooihuiskraal mediese sentrum gejaag waarna sy per ambulans na die Sunninghill hospitaal geneem is.

Volgens Braam Kruger van die Emer-G-Med nooddienste is sy kort na aankoms by die hospitaal dood verklaar.

Polisiewoordervoerder, konst. Tumisang Moloto, polisiewoordvoerder, het dié voorval bevestig.

Volgens hom het ses gewapende mans omstreeks 18:39 die winkel binne gestorm. Een van die mans het oor die toonbank gespring en  ‘n onbekende bedrag geld geroof.

“Nadat die gewapende  mans die winkel geroof het, is hulle by die winkel uit waar hulle ‘n vrou in die parkeerterrein noodlottig gewond het. Nog niemand is in hegtenis geneem nie.  Die polisie is besig om die saak te ondersoek..”

Geen begrafnisreëlings is nog getref nie. Susan laat haar man, Nico en twee dogters, Sannchen (23) en Mardi (20) agter.

“Die familie is stukkend en nog lam van skok. Hulle was tot laat gisteraand by die hospitaal,” het die familiewoordvoerder Sondag aan Rekord gesê.