Marco en Ruvé deel ONS se musikale reis

Die Afrikaanse musiektoneel gons met die vars, lewendige klanke van ONS, ’n dinamiese duo bestaande uit Marco van Deventer en Ruvé Erasmus.

Wat begin het as ’n toevallige voorstel deur Ruvé se broer, het ontstaan in ’n belowende musikale vennootskap wat die harte van aanhangers regoor Suid-Afrika vasgevang het.

Musiek is beslis in Ruvé se bloed, met haar ouma, Rita Erasmus, wat jare lank koor afgerig het, en haar oupa, ds. Dopper Erasmus wat die skrywer van Carika Keuzenkamp se lied “Timothy” is.

Marco het sy liefde vir musiek ontdek toe hy destyds leer kitaar speel het om ’n meisie te beïndruk.

Ruvé vertel van die begin van ONS. “My broer, Riekert, en Marco was saam in die Mopane-koshuis. Riekert het geweet hoeveel musiek vir my beteken en het altyd probeer om my drome te ondersteun. Toe Marco, wat reeds in ’n ander musiekgroep was, se maat oorsee moes vertrek, het Riekert ’n geleentheid gesien. Aanvanklik het ons gedink dit was net nog een van sy planne, maar min het ons geweet wat kom!”

Die aanvanklike vonk het ontvlam toe die twee vir die eerste keer saamgesing het. “Daar was ’n oomblik nadat ons ‘Dans’ van Riana Nel saam gesing het dat ons albei besef het iets hieruit kan kom,” verduidelik Ruvé.

Daardie oomblik was die geboorte van ONS, en die duo het hul musikale samewerking ernstig begin opneem.

Marco erken dit het ’n bietjie oortuiging gekos om Ruvé aan boord te kry. “Toe ek sien ‘Wees ’n Man’, my ander sosiale media-bladsy, groei nie net in videokwaliteit nie, maar ook in konsekwentheid, het ek geweet ons kan dieselfde vir ONS doen. Dus, met ‘Wees ’n Man’ as basis, het ek Ruvé oortuig om dit te probeer!”

Hul eerste enkelsnit “Daai Liedjie” weerspieël hul kreatiwiteit en gedeelde ervarings.

“Dit gaan oor wanneer jy ’n spesiale konneksie met iemand het en jy soek mekaar in skares en by partytjies omdat jy altyd aan mekaar dink,” sê Marco. “Die opnameproses was opwindend en selfs meer spesiaal gemaak deur saam met bekende vervaardigers en musikante te werk.”

Ruvé is tans ’n student aan die Universiteit van Pretoria (Tuks), wat haar balans tussen akademie en musiek ’n prestasie maak. “Dis moeilik, maar as jy toegewyd is, is enigiets moontlik,” sê Ruvé.

“Ek moes aan die begin van die jaar gaan sit en alles beplan om my musiek en akademie te balanseer. As jy misluk om te beplan, beplan jy om te misluk.”

Ten spyte van die uitdagings het hulle daarin geslaag om hul dubbele verantwoordelikhede effektief te navigeer. “Ons grootste uitdaging was beslis om vir Marco balans te vind tussen ‘Wees ’n Man’ en ONS musiek, en vir Ruvé tussen studies en ONS musiek. Maar ons het goed begin beplan en ons tyd doeltreffend gebruik om te verseker dat alles die regte hoeveelheid aandag kry.”

Aanhangers van ONS kan in die nabye toekoms opwindende nuwe projekte verwag. “Daar is beslis ’n paar lekker dinge vir ons op pad! Beslis nuwe musiek, maar ons kan nog nie alles verklap nie,” sê Ruvé.

Vir aspirant-musikante bied Marco en Ruvé eenvoudige dog kragtige raad: “Doen dit net! Begin [dit] op sosiale media plaas, want dit is beslis die grootste manier om gesien te word. Ons weet dit is skrikwekkend, maar onthou hoekom jy dit wil doen en besluit of dit groter as jou vrese is!”

Ten slotte het hulle ’n opregte boodskap vir hul ondersteuners: “Dankie, dankie, dankie! Sonder julle sou ons beslis nie gewees het waar ons vandag is nie. Dankie aan almal wat ons musiek ondersteun en video’s met ons musiek maak; Ons is so dankbaar vir jou! Ons hoop ons het nog ’n lang pad om saam te stap!”

Met hul aansteeklike entoesiasme, onmiskenbare talent en onwrikbare ondersteuning van hul aanhangers, is ONS gereed om ’n blywende impak op die Suid-Afrikaanse musiektoneel te maak.

Luister na ONS se hulle nuwe enkelsnit “Lag” hier: ONS – Lag (Amptelike Musiekvideo) (youtube.com)

Het jy dalk meer inligting rakende dié storie? 

Stuur gerus vir ons ‘n epos na  bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.