Die Jopie Fees wat die komende naweek by die Voortrekkermonument sou plaasvind is nié gekanselleer nie maar slegs uitgestel.

Volgens die organiseerder is dit weens te min ondersteuning en belangstelling in dié fees.

“Die fees is nie gekanselleer nie, dit word slegs uitgestel na volgende jaar toe.”

Teen Dinsdagmiddag het die organiseerder gesê die voorlopige datum is nou 8 Maart 2025, nadat daar aanvanklik gesê is die nuwe datum vir die fees is 28 Maart 2025.

Die organiseerder het bygevoeg dat hulle dit nader aan die tyd sal bevestig asook die lys van kunstenaars wat gaan optree.

“Dit beteken alles word net geskuif na die nuwe datum toe. Ons probeer om dieselfde kunstenaars vir die uitgestelde datum te kry.”

Dit kom ten spyte van ‘n plasing op dié fees se Facebook-blad Dinsdagoggend wat sê die fees is gekanselleer.

Hier is die plasing:

“Dit is met swaar en seer harte dat ons moet aankondig dat die Jopie Fees gekanselleer is weens omstandighede buite die organiseerders se beheer,daar was net te min ondersteuning en belangstelling.

“Ons vra u geduld en gebede gedurende hierdie moeilike tyd.

“Ons het julle kontakbesonderhede en sal kontak maak oor die pad vorentoe.

“Enige verdere navrae kan gerug word aan feesjopie@gmail.com.”

Lees ook: Skilderye opgeveil om vermaakbedryf te help

Dié plasing het ‘n groot reaksie op sosiale media ontlok met baie mense wat kaartjies gekoop het wat wou weet of hulle ‘n terugbetaling gaan ontvang.

Volgens die organiseerder sal die verkoopte kaartjies net oorskuif na die nuwe datum toe, so ook die mense wat reeds betaal het vir stalletjies by dié fees.

Die fees het gespog met ‘n lys van 25 kunstenaars wat sou optree, insluitende Steve Hofmeyr, Karlien van Jaarsveld, Early B, Kurt Darren, Jo Black, Biggy, Loufi, Juanita du Plessis, Dirk van der Westhuizen, Bobby van Jaarsveld en nog vele meer.

Teen Dinsdag het Steve Hofmeyr gesê hy is hartseer maar dat dit wys  is om te onttrek as jou boeke nie gaan klop nie.

Het jy dalk meer inligting rakende dié storie? Stuur gerus vir ons ‘n epos na bennittb@rekord.co.za of skakel ons by 083-625-4114.

Vir jou daaglikse gratis gemeenskapsnuus, besoek Rekord se webwerf: Rekord

Besoek ook ons Facebook, Twitter en Instagram blaaie.

*Neem asb kennis die artikel is gewysig.