Amateur stoei in Pretoria is baie gesond en dit gaan steeds van krag tot krag.

Hierdie stelling is verlede Saterdagaand bewys toe die Noord-Gauteng stoeivereniging (GNS) se jaarlikse prestige prysuitdelingsfunksie in die Ooste van Pretoria aangebied is. Dié vereniging se jarelange president, Danie Odendaal, het by dieselfde geleentheid ook sy laaste amptelike boodskap gelewer, aangesien hy na vyf jaar as president vanjaar uittree.

Odendaal het ’n oorsig oor die indrukwekkende stand van sake by dié vereniging gegee in sy toespraak, voordat hy die presidentskap aan Jurie Human oorhandig het. Hy het ook al die nuwe inisiatiewe van GNS verduidelik.

Odendaal het gespog met die grootste trofee op die tafel (dieselfde grootte as die rugby-Curriebeker) voor in die saal en aan die gehoor vertel dat dié trofee, wat jaarliks aan die beste provinsie toegeken word, in sy bestaan van meer as 80 jaar langer in Pretoria gestaan het as by enige ander vereniging in Suid-Afrika.

Noord-Gauteng se stoeiers het vanjaar by die nasionale kampioenskap weer 16 uit ’n moontlike 19 trofeë gebuit.

Verskeie stoeiers het verskillende vlakke van provinsiale kleure ontvang, terwyl daar ook ’n paar was wat met hul prestasies op internasionale vlak kon spog.

Onder die klubs was daar ook gesonde wedywering, maar Tukkies en Centurion het uitgestaan as die twee klubs wat met die meeste toekennings beloon is.