Die Vorster broers ryg die drieë in op die rugbyveld
Die Vorster-broers van Pretoria is vanjaar as kombinasie een van Korrektiewe Dienste se geheime rugby-wapens in die Blou Bulle se Carlton B-liga.
Die drie Du Preez broers van die die Sharks was onlangs in die nuus toe hulle aldrie deel geword het van Rassie Erasmus se Springbok groep, maar dié seuns van Robert du Preez senior is nie die enigste broeder-driemanskap wat vanjaar saam in ‘n groen trui op die rugbyveld uitdraf nie.
Pretoria het ook drie broers wat weekliks skouer-aan-skouer hul teenstanders terroriseer op die rugbyveld. Hulle is die Vorster-broers en dié drie is ook ‘n gedugte trio in die bekende groen rugbytruie van Korrektiewe Dienste.
Jan, Nico en Fanie Vorster het vroeër vanjaar nie net geskiedenis gemaak deur almal saam vir dieselfde span in een van die Blou Bulle se amptelike ligas uit te draf nie. Dié drie broers het boonop in dié wedstryd aldrie ‘n kans gehad om ‘n drie te druk in ‘n Carlton B-liga wedstryd teen die Silver Valke.
Die drie broers het nie minder nie as 55 punte aangeteken in dié wedstryd, waartydens Korrektiewe Dienste hul teenstanders behoorlik kafgedraf het. Fanie, wat op heelagter diens doen vir die span, het een drie gedruk en nog 25 punte met die skopskoen aangeteken. Nico, wat flank speel, het twee keer agter die doellyn gaan kuier, terwyl Jan vanaf die senter posisie die kersie op die koek geplaas het deur ‘n driekuns te behaal.
Hoewel die Vorster broers vir Korrektiewe Dienste (deesdae ‘n oopklub) uitdraf, is hulle aldrie in die onderwys betrokke, waar hulle natuurlik ook hul kennis en ervaring op die veld aan skoolseuns oordra as afrigters.
Vir jou daaglikse gratis gemeenskapsnuus, besoek Rekord se webwerwe:
Besoek ook ons Facebook, Twitter en Instagram blaaie.
