SWARTWATER – ‘n Afgetrede dokter wat jare lank op Lephalale praktiseer het se erg verminkte lyk is Maandag op sy plaas gevind, sowat 200 meter van sy huis waar hy vermoedelik reeds Saterdag vermoor is.
Louis-John Botha (64) se lyk is in ‘n waterkuil op sy plaas, Gwelo Safaris, ongeveer 12 km vanaf Swartwater gevind.
Sy vriendin, wat ook op die plaas bly, was vir die naweek Pretoria toe. Sy kon hom na bewering Saterdag nie in die hande kry nie en toe sy steeds Sondag hom nie in die hande kon kry nie, het sy van die bure gekontak om ondersoek in te stel.
Hulle het tekens gevind dat daar ‘n inbraak plaasgevind het by sy huis en bloed op die stoep en in die huis gesien. Die polisie is ontbied.
Volgens Kol Ronel Otto, provinsiale polisiewoordvoerder, lyk dit volgens die voetspore of Botha deur drie persone aangeval is. Die kluis was oop, maar daar is nie sekerheid oor wat moontlik gesteel is nie. Teen gisteroggend is niemand nog in hegtenis geneem vir die moord nie. Die polisie is op soek na vier verdagtes in verband met die moord, het Otto bevestig.
Botha het sowat 15 jaar gelede heeltyds begin boer met wild op sy plaas. Hy laat twee dogters, Riëtte Bredenkamp van Pretoria en Melanie Sloan in Australië agter asook sy 85-jarige moeder Iva, wat ook in die Swartwater-omgewing woon.
Sy seun, ook Louis-John, en dié se vriendin is laasjaar in ‘n vliegtuigongeluk dood naby Prieska.
Botha word op Maandag, 9 Maart vanuit die N.G. Kerk Swartwater begrawe.
• Dit is die tweede voorval in die omgewing vanjaar: in Januarie is die 76-jarige Susan Kotze verwurg op ‘n plaas naby Lephalale. ‘n 22-jarige plaaswerker is in hegtenis geneem na haar moord. Hy is kort daarna by ‘n familielid se huis by Northam in hegtenis geneem.
Boer se verminkte lyk in waterkuil gekry
