Noot vir Noot-aand laat geldnote inrol

Deelnemers aan Pietersburg Laerskool (PLS) se Noot vir Noot-aand het Vrydag speel-speel ‘n bydrae tot die lewens van minderbevoorregte kinders gemaak.
Die funksie is deur die skool se Ondersteu-ningsgroep gereël om geld vir leerders uit minder gegoede huise in te samel.
Dertien spanne het aan die kompetisie deelgeneem waar spanlede se musiekkennis op die proef gestel is. Elke span het ‘n tema gehad om die aand skop te gee.
Die beurtsangitem, waar die mikrofoon van span tot span aangegee is en elke deelnemer ‘n inset moes lewer, het vir groot vermaak gesorg.
Die span van Tafel 10, wie se tema ‘Vakansie by die see’ was, het as wenners uit die stryd getree.
Dave Retief, voorsitter van die Ondersteuningsgroep, sê geld word deur die jaar vir hulpbehoewende leerders ingesamel om hulle met uitgawes wat tydens skooltoere en sportaktiwiteite aangegaan word te help.
“Daar is so ‘n groot behoefte in ons gemeenskap en ons wil graag aan alle kinders ‘n gelyke geleentheid gee om hul talente te ontwikkel en aan aktiwiteite deel te neem.”

BARRY VILJOEN
>>barryv.observer@gmail.com