Boksafrigter Lovey sterf skielik
Die stad het een van sy bekendste en geliefste inwoners, Lovey Duvenhage, verlede Woensdag aan die dood afgestaan nadat hy aan ‘n hartaanval gesterf het.
POLOKWANE – Hy was 70 jaar oud en was veral bekend vir sy bydrae tot boks in die stad en die provinsie.
“Hy het altyd almal gehelp met enigiets, hy was goed met sy hande, het voertuie reggemaak en was ’n goeie, dog streng, pa,” vertel een van sy oud-boksers.
Lees ook: Stad groet bekende: Leon Davel se gedenkdiens
Sy vrou van 48 jaar, Catharina, vertel dat Lovey, soos hy alombekend was, as st. 6-leerder na die destydse Pietersburg gekom het. Hy was die eienaar van die destydse Lynx Boksklub en het talle mense afgerig in boks, en saam met boksers oorsee gegaan om daar mee te ding. Hy was ook die President van Boxing SA.
‘n Jarelange vriend, Kallie Snyman, sê dat Lovey ‘n saggeaarde persoon was wat altyd sy medemens bo sy eie belange gestel het.
“Amateurboks was sy passie, en hy was ook betrokke by die afrigting van sy eie vier seuns wat almal groot hoogtes in boks bereik het as Verre-Noord en Noord-Transvaalkampioene asook S.A. kampioen (Jan) en Protea-kleure (Braam). Rudi was die S.A. Ope-kampioen in 1986 en Nico was S.A. kampioen in 2000. Lovey self het sy Protea-kleure verwerf toe hy as S.A.-afrigter gekies is vir deelname in Kopenhagen, Denemarke in 2002.” Hy was ook betrokke by die afrigting van Kallie en sy seuns, asook Kallie se broer, Ampie.
Die egpaar se vier seuns is nie meer by boks betrokke nie.
“Lovey het in 2002 as hoofafrigter vir die laaste maal saam met ‘n groep boksers Kopenhagen toe gegaan. Daarna het hy bloeddrukprobleme gekry en die boks gelos,” vertel Catharina.
Sy vertel dat die dokter haar ingelig het dat Lovey sowat vier maande gelede reeds ‘n ernstige hartaanval moes gehad het wat skade aan sy hart veroorsaak het. Sowat agt dae voor sy afsterwe verlede week het hy weer ‘n groot hartaanval gehad. Hy word oorleef deur een broer, Robert, en ’n suster, Monica. Benewens Catharina en sy vier seuns en drie skoondogters laat hy 12 kleinkinders na.
“Ek sien hom steeds oral in die huis. Ons was sielsgenote en 48 jaar getroud. Ons het alles gedeel en die verlange gaan nooit weggaan nie,” sê Catharina.
