POLOKWANE – Die leerders van Oosskool se gr.1-groep kry elke jaar die geleentheid om tot een van die skool se gunsteling tradisies, Boomplantdag, by te dra. Vanjaar was nog meer spesiaal aangesien daar nie net een boom geplant was nie.
Die gr.1-leerders is tans verdeel in groepe weens die Covid-19 pandemie. Die groep wat op Donderdag, 3 September by die skool was, het ‘n Vlierboom geplant terwyl die groep wat op Vrydag, 4 September by die skool was, ‘n Wildepruim boom geplant het.
Skoolhoof, Gideon Pelzer het aan die leerders verduidelik waarom bome belangrik is. “Bome help om die koolstofdioksied wat ons uitasem, uit die atmosfeer te verwyder en dit laat ons skoolgrond mooi lyk. Dit is elkeen van julle se voorreg, en ek sê voorreg, aangesien die ander grade se leerders dit nie doen nie, om deel te wees van ‘n jare lange tradisie. Een dag wanneer julle kinders se kinders hier is, kan hulle sê my oupa was deel van hierdie tradisie.”
Ilze Landman, een van die gr. 1-onderwysers, het meer van die Wildepruim boom vertel, onder andere hoe hy tot 15m hoog word, en hoe sy blare in rosette vorm groei. “Die vrugte is medisinaal en heerlik om te eet,” voeg sy by. Sy het ook verduidelik hoe ‘n boom se bas hom beskerm en kunsmis gebruik word om hom kos te gee. Review het ‘n paar leerders gevra wat hulle geleer het.
