POLOKWANE – Wanneer ‘n mens ‘n wildtuin of natuurreservaat besoek, maak jy gewoonlik staat op jou oë om alles in te neem – die sonsondergang, ‘n trop olifante en ‘n leeu wat sy prooi bekruip is slegs ‘n paar dinge wat waargeneem kan word tydens ‘n besoek.

Alhoewel Anika Barnard (15) onlangs in die wildernis gekuier het, het sy niks van hierdie gebeurtenisse of enige iets anders raakgesien nie.

Anika is sonder oë gebore en was mishandel en verwaarloos voordat Santie en Kobus Barnard haar aangeneem het.

Sy is nooit aan enige stimuli soos klank, tas of selfs sonlig blootgestel nie.

Haar aanneemouers het egter gehelp om deure vir haar oop te maak, en na vele operasies om glasoë vir haar te kry, lewe sy nou haar lewe voluit – soveel so dat sy onlangs die hoofrol in ‘n dokumentêre film vir KykNet se Silwerskermfees vertolk het.

Call of the Wild is die breinkind van Brett de Groot.

Dit is nie altyd dat ‘n mens dink aan hoe ‘n besoek aan die wildtuin sal wees vir iemand wat nie kan sien nie.

“Hierdie dokumentêr is uniek deurdat dit ontwerp is om beide ‘n visuele en ouditiewe ervaring te bied. Ons wou seker maak dit bied volle toeganklikheid vir blinde kykers sowel as bekwame sienende kykers en gehoorgestremdes.”

Brett verduidelik dit is die eerste gedokumenteerde safari vir gesiggestremde mense.

“Anika is die eerste blinde persoon wat aan die klanksafari-ervaring deelneem. Die verfilming het by die Ditsong Nasionale Museum van natuurgeskiedenis, en in Hoedspruit plaasgevind. ”

Brett erken as regisseur was dit vir hom ‘n nuwe uitdaging om met ‘n blinde persoon te werk.

“Iemand wat kan sien is heeltyd bewus van die kamera en so ook dan bewus van hulle gesigsuitdrukkings en lyftaal. Ek moes Anika laat ontspan en seker maak sy volg my stem sodat sy moet weet waar om te kyk. Dit was ‘n ervaring soos min ander. Hierdie is nie ‘n hartseer storie oor iemand wat blind is nie, maar eerder ‘n ongelooflike voorbeeld van hoe bekwaam ‘n blinde persoon kan wees.”

Vir die opnames moes Anika ten minste 60 verskillende voëlklanke kon identifiseer. Sy het ook gehoor hoe elke dier sy kos kou en die verskillende geluide wat seekoeie maak.

“Dit was lekker toe ek die seekoeie kon sien en hulle geluide hoor,” het sy opgemerk.

KykNet Silwerskermfees se blou tapyt is net so gewild soos Hollywood se rooi tapyt en bied ‘n platform vir nuwe films, dokumentêre films aan. Call of the Wild word op 25 Augustus by die Bay Hotel in Kampsbaai bekendgestel, en die film sal op DSTV se Catchup en Showmax beskikbaar wees.