POLOKWANE – Die meeste inwoners geniet ten minste een keer per dag ‘n warm stort of bad, afhangende van die watersituasie.

Diegene wat op straat woon, is egter nie so gelukkig nie en gaan dikwels vir maande en selfs jare sonder om skoon te kom.

Kosmos Angels en Heart-Drive/Heart-Cycle het die afgelope naweek ‘n Hawelose Stort-geleentheid gereël waar die haweloses kan stort.

Bertie Nel, organiseerder van die geleentheid sê daar is ongeveer 100 mense wat van die geleentheid gebruik sou maak en 80 vrywilligers het hulle tyd afgestaan om te help.

Elke persoon is verwelkom met ‘n warm koppie koffie en iets om aan te kou. Daarna is hulle hare gesny en die mans se baarde ook. Van hier af beweeg hulle na die klere tafel waar elkeen ‘n uitrusting kry voor hulle ‘n vinnige vyfminuutstort kan neem. Daarna kon hulle sit vir ‘n verfrissende voet- en handbehandeling waarna hulle die geleentheid gekry het om hulle CV opgestel te kry.

Hulle is ook ingelig van die gevare van dwelmmiddels en hoe om hulp te kry. Hulle bloeddruk en suiker is gemeet en hulle kon daarna heerlik saamkuier.

“Ons sal die dag nie kan uitrig as dit nie vir ons borge was nie. Sonder hulle is dit net nie moontlik nie. Die dag is daar om net ‘n bietjie menswaardigheid aan hierdie mense terug te gee. Dit is die tweede keer dat ons die geleentheid hou en ons hoop om volgende jaar nog meer mense te help.”

Borge wat bedank word:

• Rotary Pietersburg 100.
• Talisman Hire.
• Thompson Panelbeater.
• Sanca.
• Westenburg Anti Drug Campaign.
• Addict Voice van Alberton.
• Back2Basics.
• Jasmyn Drums.
• FNB.
• Curry Den.