POLOKWANE – Janco Raaths het reeds op ‘n baie vroeë ouderdom geweet hy wil aan trekkers en swaarvoertuie se enjins werk en dus was die enigste logiese roete vir hom om te volg, om ‘n Tommie te word.

Dié 17-jarige leerder aan Hoër Tegniese Skool Tom Naudé het terwyl hy ‘n kaalvoetlaerskoolseun was, besluit hy wil graag met sy hande werk, veral aan motors, en om dit te leer sou hy by Tommieland moes aansluit.

“Ek het reeds terwyl ek in Pietersburg Laerskool was saam met my ooms gewerk en sodoende besef ek het ‘n passie vir hierdie werk. Dit is ook waarom ek motorwerktuigkunde as rigting gekies het.”

Janco het onlangs deelgeneem aan die Sasol Vaardigheidskompetisie, waar hy ‘n hommeltuig en R3 000 Builders Warehouse geskenkbewys ontvang het vir sy eerste plek in motorwerktuigkunde.

“Die lekkerste vir my is om heeltyd iets nuuts in die veld te leer. Wanneer jy iets regmaak, dan leer jy ook hoe dit werk. As ek iemand anders moet oortuig dat wiskunde belangrik is vir hierdie rigting, sou ek vir hulle verduidelik dat ek wiskunde nodig het om die krag wat ‘n kar se enjin gee te bereken. Ek self leer nog, maar ek kan hier en daar ‘n probleem self optel en regmaak.”

Janco beoog om na skool as vakleerling te begin werk.

“Die projek waarop ek die trotsste is, was toe ons die kompressietoets gedoen het waar ek geleer het wat kan gebeur as ‘n enjin slegte kompressie het. Buite die skool het ek geleer om ‘n enjin oor te bou en ek kan met trots sê daardie enjin werk steeds.”