MOKOPANE – Die alombekende oud-inwoner Johannes Gerhardus ‘John’ Williams, die eerste Springbokafrigter nadat Suid-Afrika weer tot die internasionale arena toegelaat is ná isolasie, is verlede Donderdagoggend in die ouderdom van 78 oorlede na ‘n stryd teen bloedkanker.

Williams is op 29 Oktober 1946 in Johannesburg gebore en min mense weet dat hy sy hoërskoolloopbaan in die hartjie van die ou-Transvaal voltooi het by Hoërskool Piet Potgieter en ‘n volbloed Pottie was.

Williams was ‘n kranige slot en onverskrokke lynstaanspringer. Hy het in sy senior provinsiale rugbyloopbaan in Suid-Afrika vir Noord-Transvaal gespeel en as slot vir die Blou Bulle uitgedraf.

Hy het sy toetsbuiging vir die Springbokke in 1971 teen die Franse op 12 Junie 1971 in die Vrystaat-stadion in Bloemfontein gemaak.

Hy het ook toetswedstryde teen Australië in 1971, Engeland in 1972, die Britse Leeus in 1974 en die 1976 teen die All Blacks gespeel en het in ‘n verdere 11 toerwedstryde gespeel en een drie vir die Springbokke gedruk.

Williams was van 1987 tot 1991 die Noord-Transvaalse afrigter en het elke jaar sy span na die Curriebeker-eindstryd gevat.

Noord-Transvaal het drie van die eindstrydwedstryde gewen: in 1987, 1988 en 1991 en in 1989 het hulle die titel met die Westelike Provinsie gedeel. In 1992 is Williams as Springbok-afrigter aangestel.

Williams is van sy pligte onthef nadat hy die span tot slegs een oorwinning in vyf wedstryde gelei het. Hy het in die middel-1990’s teruggekeer om die Bulle af te rig.

Hy het egter die rugbyveld vir sy familieplaas, Mayholme verruil, en het die laaste 20 jaar op die grens van Botswana in Limpopo geboer. Sy eerste vrou, Martie, is in 2003 oorlede.

Die egpaar het drie kinders, Elmien, Lianie en Boeta gehad.

Williams het na Martie se dood met Mariana getrou, wat saam met hom die plaas bedryf het.

John was ‘n ware rugbyman en ‘n sagmoedige reus, iemand wat terug geploeg het in die spel selfs nadat hy sy stewels opgehang het. Hy het deurgans ‘n getroue Springbok- en Bullondersteuner gebly.