Van Niekerk-jaagbroers sien uit na dié wedren

MOKOPANE – Die Van Niekerk broers WB, Edwin en Rian se harte is beslis in die motorwedrenne.

WB vertel dat die trio aan al vyf die nasionale hotrodtoerwedrenne deelgeneem het vanjaar, en danksy hulle geesdrif het hulle ‘n hele paar keer in die top drie posisies geëindig.

“Die eerste wedren was in Richardsbaai, daarna by Mahem in Pretoria en die derde een by The Rock in Brakpan. Die vierde wedren was by die Bosveld Wedrenklub in Mokopane en die laaste een by Star Raceway in Klerksdorp.”

Hy voeg trots by dat die drie broers in die finale ronde, in die top vyf posisies geëindig het, “wat ons laat kwalifiseer om in Januarie in Kaapstad teen internasionale deelnemers te gaan deelneem”.

Hulle is baie opgewonde oor dié uitdaging.