Anuska (15) in Turkye vir breinoperasie
Anuska is net na haar aankoms in Turkye in die hospitaal opgeneem, en bloedtoetse en ‘n MRI-skandering is reeds gedoen.
POLOKWANE – Die 15-jarige Anuska Deyel is tans in Turkye waar sy in die volgende paar dae ’n lewensreddende breinoperasie sal ondergaan.
Anuska is onlangs met ’n hoëgraadse, kwaadaardige breingewas gediagnoseer, ’n anaplastiese talamiese oligodendroglioom (graad 3) wat diep in haar brein geleë is.
Die gewas groei vinnig en het reeds ernstige komplikasies veroorsaak. Volgens haar ma, Natanya, was daar min behandelingsopsies oor, maar om op te gee was nie ‘n opsie nie.
Lees meer: 15-jarige Hoërskool Pietersburg-leerder veg teen aggressiewe breingewas
Sy het ‘n geldinsamelingsveldtog van stapel gestuur om die R600 000 wat benodig word, in te samel. Dié bedrag is binne slegs ‘n paar dae ingesamel, waarna reisreëlings onmiddellik getref is.
Teen 18:30 Vrydagaand was ma en dogter aan boord van die vliegtuig, waar Anuska rustig in haar sitplek kon lê. Kort ná hul landing omstreeks 04:30 is sy direk na die hospitaal geneem en opgeneem. Bloedtoetse is gedoen en ’n magnetiese resonansbeelding (MRI)-skandering is uitgevoer.
Natanya se suster, Monique van Geyn, hou familie en vriende in Suid-Afrika op hoogte van gebeure.
“In hierdie stadium sien ons die dokter Maandag. Ná die operasie sal Anuska tussen agt en tien dae in die hospitaal bly, waarvan twee dae in die intensiewesorgeenheid sal wees. Natanya slaap by haar in die hospitaal,” het sy gesê.
