HPG en AfriForum waarsku oor bek-en-klouseer in Mokopane
Bek-en-klouseer, ’n hoogs aansteeklike veevirus, word in Mokopane ondersoek deur AfriForum en HPG ná die ontdekking van beeste met sigbare sere.
MOKOPANE – Die onlangse bevestigde gevalle van bek-en-klouseer het almal tot verhoogde bewustheid gebring, wat gelei het tot intensiewe voorsorgmaatreëls om die verspreiding daarvan te voorkom.
Bek-en-klouseer veroorsaak verhoogde bewustheid
Bek-en-klouseer is ‘n ernstige, hoogs aansteeklike virussiekte van vee wat ‘n beduidende ekonomiese impak het.
Die siekte raak beeste, varke, skape, bokke en ander gespletehoefherkouers.
Die virus kom voor in alle liggaamsvloeistowwe, soos speeksel, urine, ontlasting, melk en in die lug wat siek diere uitasem.
Diere doen hierdie siekte op wanneer hulle eet of die virus van hierdie liggaamsvloeistowwe inasem.
Blase en sere in die mond, tandvleis, lippe en tong is rou en pynlik, wat dit moeilik maak vir die dier om te eet, en veroorsaak dikwels kwyl.
Hoe die siekte Mokopane-veeboere raak
Blase en sere tussen die tone en waar die hoewe by die vel aansluit, kan veroorsaak dat die diere mank is en nie wil rondloop nie, koeie kan sere op hul spene ontwikkel en dit lei tot ‘n skielike daling in melkproduksie.
Hierdie intense bewustheid het daartoe gelei dat die span van AfriForum, tydens ‘n roetine-patrollie, ‘n voertuig met twee beeste op ‘n beeswa voorgekeer en die Heritage Protection Group (HPG) gekontak het vir bystand.
AfriForum en HPG gryp op tydens ondersoek
Hendrik Hattingh van HPG bevestig dat daar geen brandmerke op die beeste gevind kon word nie, daar is wel sigbare sere op die diere te sien.
“Die bestuurder van die voertuig kon ook nie die nodige dokumente voorsien nie.”
Hattingh verduidelik dat volgens wetgewing moet die eienaar ‘n vervoerpermit sowel as die nodige brandmerksertifikaat en ook dokumente wat spesifiseer dat die dier geen tekens van bek-en-klouseer, vanaf die staatsveearts toon nie, by hom hê.
“Die wetgewing stipuleer ook dat geen lewende hawe na 18:00-05:00 die oggend vervoer mag word nie,” sê Hattingh en voeg by dat die voertuig en diere aan die polisie en veediefstal eenheid oorhandig is vir verdere ondersoek.
