Polokwane gemeenskap se R100 kan ‘n verskil maak
APD Eeufeeshuis in Polokwane vra inwoners om met R100 te help om sorgdienste vir gestremde persone te ondersteun.
POLOKWANE – Met ‘n R100-noot kom ‘n mens deesdae nie ver nie. Volgens ‘n bekende bankgroep sal R100 vir jou die basiese kruideniersware vir twee tot drie mense koop, afhangende van waar jy koop. ‘n R100 kan dalk ook sonpanele borg.
APD Eeufeeshuis se geldinsamelingsprojek en oproep tot hulp
Die Assosiasie vir Persone met Gestremdhede (APD), Eeufeeshuis het onlangs ‘n geldinsamelingsprojek geloods waar 10 000 inwoners in Polokwane slegs R100 skenk en sodoende ‘n verskil in die lewe van gestremde persone te maak.
“APD Limpopo moes onlangs ’n groot bedrag betaal om die Eeufeeshuis lewensvatbaar te hou, en dit is waarom die organisasie besluit het om ‘n beroep te doen om die gemeenskap van Polokwane te vra om te help,” sê Desiré Herb, direkteur van APD.
Versorging vir 54 inwoners onder druk
Eeufeeshuis verskaf huisvesting aan 54 gestremde persone en voorsien in al hulle behoeftes wat insluit akkommodasie, drie etes elke dag, versorging, mediese dienste, maatskaplike dienslewering, vervoer en verrykingsprojekte.
Die organisasie ontvang subsidie, maar Herb sê dit is net ‘n druppel in die emmer om al die uitgawes en instandhouding te dek.
“Met die verhoogde brandstof pryse, water, elektrisiteit, en voedselpryse, trek die organisasie baie swaar.
“Om voortgesette en volhoubare dienste te lewer is die organisasie afhanklik van vrywilligers, donasies, skenkings en geldsinsamelingsprojekte.”
Herb sê die organisasie het ‘n buitensporige hoë munisipale rekening wat hulle nie maandeliks kan bekostig nie. Hulle wil graag sonpanele installeer met die oog om die elektrisiteitsrekening laer te kry.
Dringende behoeftes en kontak
Groot uitdagings wat dringend aandag verg:
- Om sonpanele te installeer.
- Kosskenkings soos groente, vleis en blikkieskos.
- Voertuie wat dringend vervang moet word.
- Die instandhouding van die elektriese heining.
“Ons doen ‘n ernstige beroep op die gemeenskap om saam te staan en ‘n verskil in die lewe van ‘n gestremde te maak,” pleit Herb.
Om betrokke te raak, kan lesers vir Desiré Herb by 015 291 1787/8 of Mirinda Kruger by 082 455 0707 skakel.
Lesers kan ook APD besoek by Pafurilaan, Peninapark.
