POLOKWANE – Na afloop van die onlangse Afrika Armdrukkampioenskappe staan Ruan Ferns (20) voor ‘n moeilike besluit: die Afrika Spele of die finale rondtes van die Wêreldkampioenskappe later vanjaar.

Ruan het Suid-Afrika vroeër vandeesmaand in Ghana verteenwoordig, waar hy as Afrika-kampioen in sy gewigs- en ouderdomsklas gekroon is.

Hy het ook vir beide die Afrika Spele en die Wêreldkampioenskappe gekwalifiseer.

Trots ná Ghana sukses

“Ek voel trots om as Afrika-kampioen gekroon te wees. Dit is ‘n eer en bring oorweldigende emosies van vreugde mee. Dit is die erkenning van maande se harde werk, oefening, dissipline en opofferings.

“Dissipline en opofferings is uiters belangrik vir my sukses. Dit vorm die fondasie vir volgehoue langtermynprestasie. Dissipline help my om gefokus en op die regte pad te bly en om ‘n positiewe uitkyk te behou,” sê Ruan.

Volgens hom was dit ‘n emosionele oomblik om met Suid-Afrika se vlag op die podium te staan – ‘n hoogtepunt in sy loopbaan en die vervulling van maande se harde werk.

“Dit voel ongelooflik om deel te wees van die elite groep atlete wat die land kan verteenwoordig. Dit voel soos ‘n leeftyd se drome wat waar geword het. Die opofferings, tafeloefensessies, ure in die gimnasium en laat aande was die moeite werd,” vertel hy.

Prestasie in verskeie afdelings

Suid-Afrika het ‘n algehele derde plek by die 15de Afrika-kampioenskappe behaal, met 22 lande wat deelgeneem het. Ruan het aan beide die regter- en linkerarmafdelings deelgeneem.

Hy het goud met die linkerarm gewen en silwer met die regterarm verower.

“Ek het ook in die senior afdeling deelgeneem en moes teen mans buite my klas armdruk. Dit was ‘n uitdaging, maar daar was trotse oomblikke toe ek die ouer manne een vir een kon platdruk. Die adrenalien het gepomp en die opwinding van oorwinning was groot. Dit is vir my persoonlik ‘n geweldige prestasie om my vermoëns te toets en myself te bewys,” sê hy.

Toekomstige doelwitte en geloof

Ruan se volgende doelwit is om weer ‘n podiumplek te behaal, terwyl hy fokus op die verbetering van sy tegniek en krag om op ‘n hoër vlak sukses te behaal.

“Ek wil ook nuwe strategieë op die tafel implementeer en goud of silwer huis toe bring by die Afrika Spele of die Wêreldkampioenskappe. Om ‘n Afrika-kampioen te wees verg vasberadenheid en die vermoë om vir jouself te bewys dat die stryd deel van die seën kan wees.

“Geloof speel ook ‘n groot rol in my sukses. Sonder gebed en geloof in God sou niks moontlik gewees het nie.”

Ruan het ook sy dank uitgespreek teenoor almal wat in hom glo en hom ondersteun.