POLOKWANE – Biologiese verwantskap, of bloed, alleen maak nie van ‘n man ‘n pa nie; ‘n ware pa is iemand wat teenwoordig is, liefde gee, ondersteun en sy kinders deur die lewe lei. Deur belangstelling in ‘n kind se lewe te toon en net daar te wees vir hom, speel ‘n man ‘n groot rol in ‘n kind se lewe.

Werner Christou is nie net ‘n pa vir twee jong seuns en ‘n peuter-dogter nie, maar ook vir elke leerder in Laerskool Piet Hugo, waar hy skoolhoof is.

Geloof en waardes as fondament

Christou is dit eens dat om ‘n Godvresende mens te wees en God volkome in jou hart te hê en dit uit te leef, eienskappe van ‘n goeie pa is.

Voorbeeldstelling en tyd vir gesin

“Jy moet altyd die voorbeeld wees. Respek en eerlikheid is waardes wat ek as uiters belangrik beskou wat elke pa moet hê. Gee jouself volkome aan jou gesin en maak altyd tyd vir hulle, want tyd is kosbaar en ons is nooit gewaarborg van tyd nie. Maak tyd, al is dit vyf minute, want daardie vyf minute sal nooit weer opgevang word as dit eers verby is nie.

“Prioritiseer jouself want jou omgee, liefde en tyd aan jou gesin is ‘n belegging in jou lewe en in hulle s’n. Maak altyd tyd, al is jy hoe moeg.”

Vadersdag en dankbaarheid

Christou sê Vadersdag vir hom is die herinnering om te besef hoe geseënd hy as ‘n pa is om die voorreg te hê om wonderlike kinders te kan hê en om ook met soveel kinders te werk by die skool en as ‘n vaderlike figuur ‘n verskil in elkeen se lewe te maak na die beste van sy vermoë.” 

Die belang van vaderfigure in kinders se lewe

Vir Christou is dit belangrik dat elke seun en dogter in die lewe ‘n vaderfiguur het om die nodige waardes te leer en so ook geliefd en waardeer te voel.

Dit bring die beste in elke leerder uit. Tog is balans belangrik.

Balans tussen skool en gesin

“As hoof is ek bevoorreg om twee families te hê; my persoonlike gesin, en die skoolfamilie. Elke leerder het liefde en ondersteuning nodig, wat ek aan elkeen gee.

“My gesin is egter my ‘happy place’ en absolute ondersteuningspilaar. Hulle is van kardinale belang in my geestelike gesondheid en ek glo familie is die basis van elke mens se geluk. Ek benut elke moontlike oomblik saam met my gesin.”

Waardes vir kinders se groei

Respek, geloof, liefde, omgee, dankbaarheid en verantwoordelikheid, is volgens Christou die hoekstene van enige kind se groei in die samelewing.

Kinders leer verskeie lesse by hulle pa’s en Christou sê wanneer jy hard werk in die lewe sal jy altyd die vrugte daarvan pluk.

Geloof, deursettingsvermoë en voorbeeld

“Lewe altyd in God se weë, jy kan alles doen met Hom aan jou sy.

“Niks in die lewe kom verniet nie en ons moet met sterk wilskrag leef om die wêreld om jou te verander. Wees die verskil.”

Die impak van omgee en vaderlike leiding

As hoof van die skool het Christou geleer dat elke kind geliefd moet wees en aanvaarding nodig het.

“Die kleinste daad kan ‘n wesenlike verskil in iemand se lewe maak en hom voorberei vir die volwasse lewe. Ek as hoof en opvoeder moet altyd die voorbeeld met deernis, omgee en liefde wees vir die kinders wat nie voorbeelde het nie. Waar kinders sonder pa’s se liefde groot word, ontbreek respek teenoor die samelewing.

“Soveel van ons jong seuns word sonder pa’s groot, en daar is ‘n gebrek aan liefde en respek teenoor hulle medemens, waardes en norme om suksesvolle jong mans te word. ‘n Pa is ‘n voorbeeld van hoe ‘n man ‘n vrou moet hanteer en op die hande dra.”