POLOKWANE – Lede van verskeie veiligheidforums in die stad het gisteraand (Donderdag) kragte saamgespan in ‘n poging om sigbaarheid te bevorder en die woonbuurte se strate te beveilig.

Polokwane Buurtwag, Polokwane Gemeenskapspolisiëringsforum (GPF), Leeuwkuil Saftey Forum en Bendor Sterpark Safety Forum het nie net aan ‘n massapatrollie deelgeneem nie, maar ook probleemareas soos die Floraparkdam en onbewoonde of onvoltooide boustrukture besoek.

Die operasie is in Fauna- en Florapark uitgevoer. Meer as 200km is deur die lede, op eie onkoste afgelê tydens die massapatrollie en operasie.

Meer as 200km is deur die lede, op eie onkoste afgelê tydens die massapatrollie en operasie. https://t.co/bI6DGNo7lG

— Polokwane Observer (@PolokwaneObserv) October 16, 2026

Polokwane Buurtwag-voorsitter, Johan Spaumer sê met die feesseisoen om die draai, en ‘n styging in misdaad wat kenmerkend is gedurende dié seisoen, begin veiligheidforums vroeg reeds met soortgelyke patrollies en veral sigbaarheid.

“Dankie aan al die lede wat hulle tyd opoffer om ‘n verskil in die gemeenskap te maak,” het Spaumer gesê.

Polokwane Safety Forum-voorsitter, Johan Retters sê almal het een doel en dit is om misdaad te beveg en ‘n veiliger gemeenskap te bou.

Hy het lede vir hulle toewyding bedank.