Renosterkop se uithaler-fees beïndruk
Feesgangers het die aktiwiteite op die Renosterkop Boerefees, wat Saterdag net buite Polokwane gehou is, baie geniet.
POLOKWANE – Feesgangers het die aktiwiteite op die Renosterkop Boerefees, wat Saterdag net buite Polokwane gehou is, baie geniet.
Die boeregemeenskap het die dag gereël met drie doelstellings:
1. Bewusmaking oor veiligheid in die gebied.
2. Samehorigheid in die gemeenskap.
3. Om mense die kans te gee om te sien hoe ‘n plaas werk en die koste daaraan verbonde te verstaan.
Tydens die boeredag was daar 12 beesrasse, drie bokrasse en ‘n verskeidenheid skape te sien. Daar is ook gedemonstreer hoe ‘n skaap geskeer word. Uitstallers het gedemonstreer hoe verskillende trekkers verskillende implemente hanteer.
Die geld wat ingesamel is tydens die fees sal gebruik word om veiligheid op te skerp deur nuwe handradio’s en radiotorings aan te skaf. “Ons wil ook graag skenkings gee vir die bewaring van renosters,” sê Dawid Malan een van die organiseerders van die fees.
“Die diere wat doodgemaak word plaas boere en hul werkers in moeilike situasies, finansieël en emosioneel, en ons wil graag bydra om daardie omstandighede te voorkom.”
