Twee broers van die Unicor Stoeiklub op Bethal, Sebastian en Theunis Nel, het vanaf einde April tot 1 Mei aan die Afrika Stoeikampioenskap in Egipte deelgeneem.

Sebastian het in die o20 Grieks-Romeinse afdeling deelgeneem en ’n brons medalje huis toe gebring terwyl Theunis moes onttrek van die kampioenskap weens ’n enkel-besering.

Dié twee broers het ook beide die Mpumalanga Stoeispan gehaal nadat hulle die proewe wat op 18 April plaasgevind het, geslaag het.

Ander stoeiers van die Unicor Stoeiklub op Bethal wat ook goed gevaar het in Grieks-Romeinse proewe en die Mpumalanga-span gehaal het, is Udo Dorfling (o11), Luhan Steenkamp (o11) en Wynand Prinsloo (o13).

Al dié stoeiers gaan op 30 Mei aan die Suid-Afrikaanse Stoeikampioenskap in Pretoria deelneem en hul vaardighede wys.