Spar Superstars Umlazi 2024

ULUYANDA Mzobe ofunda eHP Ngwenya Primary School, eChesterville, akaconsi phansi kozakwabo nothisha ngenxa yekhono lakhe elimangalisayo kunobhutshuzwayo.

Lomfundi kaGrade 4 udlala emumva kanti uthi ukuswela izinsiza kudlala ikhona okwenza abhekane nezinselelo ezihlukene kunobhutshuzwayo. ULuyanda uveze ukuthi uma engathola izinsiza kudlala okubalwa amakhokho, izinto zokuvikela umbala, ijezi nezokujima lingaba sezingeni eliphezulu izinga lokudlala unobhutshuzwayo kuyena.

ULuyanda oneminyaka yobudala eli-10, uyakholwa ukuthi ikhono lakhe kunobhutshuzwayo lizomenza ukuba azibone esedlalela iqembu lesizwe iBafana Bafana. Ngaphandle kwanobhutshuzwayo uLuyanda unephupho lokuba iphoyisa ngenhloso yokuqeda ubugebengu.

“Ubugebengu sebande kakhulu eNingizimu Afrika kanti kudingeka amaphoyisa anothando lomsebenzi ukuze kuqedwe ubugebengu. Kuliphupho lami ukuzibona ngiyiphoyisa eminyakeni ezayo ukuze ngizogcina izakhamuzi ziphephile,” esho.

Lo kaMzobe akagcini nje ngokuba nekhono kunobhutshuzwayo kodwa ubuye aziwe ngokwenza ezibukwayo kuzifundo okubalwa i-English neMaths. Othisha bakhe bamuchaza njengomfundi ohloniphayo, ozimiselayo emisebenzini yesikole futhi ulusizo kozakwabo uma bedinga usizo oluhlukene.

Ngezimpelasonto uLuyanda uthe uchitha isikhathi ngokujimela unobhutshuzwayo eqenjini lakhe iNozi Academy, abuke unobhutshuzwayo kumabonakude okuyinto azifelayo ngayo, enze imisebenzi yasekhaya neyesikole.

INHLANZEKO ayifunde ekhaya uMinenhle Ngobese seyimenze waklonyeliswa esikoleni sakhe ngokuba umfundi onomsebenzi wesikole ohlanzekile.

UMinenhle, 10, ofunda uGrade 4(A), eVumokuhle Primary School, akaconsi phansi kothisha nakozakwabo ngenhlanzeko kumfaniswano nakumsebenzi wesikole. Lomfundi uveze ukuthi inhlanzeko into akhuliswe ngayo kubo.

“Ekhaya ngihlezi ngitshelwa zonke izinsuku ukuba ngenze izinto ngokuhlanzeka futhi name ngihlezi ngihlanzekile ukuze yonke into engiyenzayo izothandeka. Kuyangijabulisa ukuthi esikoleni bayakubona futhi bayakujabulela ukuhlanzeka kwami,” esho.

Lo mfundi uphinde adume ngokuziphatha kahle nangenhlonipho kothisha bakhe nakozakwabo. UMinenhle akagcini nje ngalokhu osekugagulwe ngenhla, kepha uphinde adume ngokuphumelela ngamalengiso izifundo okubalwa iNatural Science, isiZulu, iTechnology neSocial Science.

Othisha bakhe bathi abamangali ukuthi uMinenhle ufuna ukwenza izifundo zokuba uthisha uma esephothule umatikuletsheni njengoba ebuye afundise ozakwabo aphinde abachazele lapho bengaqondi khona. Lomfundi uthe isizathu sokuba afune ukwenza izifundo zobuthishela ukuthi uyazifela ngokufundisa.

UMinenhle uthe umuntu abukela kuyena uzakwabo u-Amahle Dlamini othandwa ibona bonke abantu esikoleni ngenxa yokuziphatha kahle nokukhalipha kwakhe.

U-ALWANDE Sabela uchazwa othisha bakhe njengomfundi oyisibonelo esihle kozakwabo esikoleni.

Lo mfundi waseMlazi owenza ibanga lesi-11 eSbusisiwe Comprehensive Technical High School, udume njengohloniphayo, ohlanzekile, ophumelela ngamalengiso kuzifundo zakhe nokwazi ukuhlela izinto zakhe.

U-Alwande oneminyakayobudala eli-16 uphinde adume ngokuhamba phambili ngekhono lakhe lokumodela njengoba esenqobe izicoco ezinhlanu kusukela engine kumkhakha wonobuhle nyakenye.

Izicoco asezinqobile kubalwa iPublic Choice amahlandla amabili, iMiss Summer Splash Queen, iMiss Teen Umlazi Exquisite Queen neMiss Curve OSS. Eminye angatholanga indawo yokuqala kuyona kodwa wazuza izicoco kubalwa iMiss KZN Elegent, iMiss Royalty Durban neMiss Durban.

Othisha bakhe bamuchaza njengomfundi othanda futhi osiza ozakwabo uma bebhekana nezingqinamba kuzifundo ezahlukene. Lo mfundi ubukeka enamakhono ahlukene njengoba ebuye achazele ozakwabo lapho bengaqondi khona.

Uma esephothule umatikuletsheni ufuna ukwenza izifundo zeQuantity Surveying   bese esungula nenhlangano engenzi inzuzo ezothuthukisa abesifazane. Izifundo aziphumelela ngamalengiso kubalwa isiZulu, icivil engineering, Izibalo nesiNgisi.

Uma engekho esikoleni u-Alwande upheka ukudla okwahluke nenjengoba ezifela ngokupheka. U-Alwande uthe ikhono lakhe lokupheka lisezingeni eliphezulu njengoba ekwazi ukupheka izinhlobo zokudla okwehla esiphundu ezahlukene.

Njengoba eyintombazane enesineke, u-Alwande ubuye asebenzise isikhathi sakhe sokujabula ukuthuthukisa ikhono lokumodela entsheni. Ufundisa intsha ezibukela phansi ukuba iziqhenye ngemizimba yayo.