Hy is self tans werkloos, maar sy geloof is rotsvas. “Die Here sorg nog elke dag vir ons,” sê Chris, wat saam met sy vrou Esmé, ook hul kleindogter wat in Gr. 3 is, grootmaak. Omdat hy so geseënd is wil hy graag sy deel doen om die gemeenskap te help.

Hy het besluit om die Bybel met die hand oor te skryf en dan mense te kry wat donasies kan gee, of die projek kan borg. Geld wat sodoende verkry word, sal dan gebruik word om kos te koop vir die 77 gesinne wat hy graag wil help. Die getal 7 is die volmaakte getal en daarom het hy op 77 besluit. “Ons moet ‘n verskil maak in hierdie donker tyd van die Corona-virus,” het hy in ‘n brief aan Vaalweekblad laat weet.
Tot dusver het hy al 12 van die 27 boeke van die Nuwe Testament klaar en ook al ‘n paar van die Ou Testament. Chris sal dit ook waardeer as iemand hom dalk kan help om sy studies in sy finale jaar aan die Bybel Kollege te kan betaal. Dis eers later, vir eers wil hy graag sy 77 huisgesinne-projek van stapel stuur.

Indien jy sou belangstel om betrokke te raak, kan jy vir Chris ‘n SMS by 071 266 5078 stuur.
Skenkings van Bybels, penne, skryfblokke en nie-bederfbare kos kan gemaak word, of jy kan jou tyd afstaan en help met die insameling en verspreiding van die kos en Bybels. Mense wat geroepe voel om te help met die skryfwerk, kan hom ook kontak.