Die twee skuts van Hoërskool Fochville wat Suid-Afrika verlede maand tydens die British Junior International skietkompetisie verteenwoordig het, het hulself uitstekend van hul taak gekwyt.

“Na Ané Gerber en Chanél van Wyk se deelname in Londen, weet almal beslis wie hulle is. Die twee graad 11-leerlinge van Hoërskool Fochville het beslis gewys waartoe hulle in staat is,” sê die skool se woordvoerder, Elsabe de Mesquita.

Ané Gerber is amptelik as die tweede beste junior pistoolskut aangewys en Chanél van Wyk as die sesde beste junior geweerskut.

Beide leerders het van 16 tot 20 Augustus aan die kompetisie deelgeneem.

“Hoërskool Fochville is só geseën met soveel talent wat jaarliks aan hulle toevertrou word. Hierdie twee jonge dames se besonderse prestasies wat hulle bereik het, getuig van toegewydheid, selfdissipline en ure se harde werk. Die nederigheid waarmee hulle hierdie topprestasies losgeskiet het, is absoluut wie hulle is. Baie geluk julle tweetjies; mag die SA’s later in die jaar net verder op julle talente en gawes bou,” sê De Mesquita.