Atlete van die bekende Smithathlons-atletiekklub van Carletonville het die afgelope week uitstekend tydens die NWU Wildeklawer Top 30 byeenkoms in Sasolburg presteer.

Volgens die klub se afrigter, Annatjie Smit, het Tsepo Magotsi, Remmone Morobi, Xolani Kotoi, Jutani Blaaw, Sbusiso Ndiko, Danie de Wet en Lesego Thela van 15 tot 17 Oktober aan die byeenkoms deelgeneem.

Sbusiso Ndiko het silwer medaljes in die seuns o16 100 m en 200 m ingepalm, terwyl Morobi ‘n brons medalje in die seuns o19 400m-item verower het. Hoewel die kompetisie Kotoi se eerste groot byeenkoms was, het hy ‘n indrukwekkende vierde plek in die seuns o19 110m- hekkies behaal.

Smit was vol lof vir haar atlete en het gesê dat 99% van die atlete hul persoonlike beste tye gehardloop het.

“Drie van die atlete het reeds tye wat hulle vir die SA’s kwalifiseer, gehardloop. Dit is uitstekend, want al wat ek van hulle verwag het, was om ‘n persoonlike beste te hardloop. Ek het geen druk op hulle geplaas nie omdat dit nog voor die atletiek seisoen was.”