Christa Gladd (39), van DF Malanstraat, Rensburg is helder oordag deur ‘n man in haar erf gewurg, met ‘n baksteen geslaan en hy het haar probeer skiet. Christa het op 17 Januarie om 16:30 haar bure se hond hoor tjank en is na buite om ondersoek in te stel. Langs haar motorhuis het sy in twee mans vasgeloop. Die ouer een het haar aan die keel gegryp voor sy ‘n geluid kon maak en met sy ander hand met ‘n baksteen in die gesig geslaan. Toe die baksteen breek het hy ‘n wapen uitgepluk en haar probeer skiet terwyl hy haar steeds gewurg het. Die wapen wou nie afgaan nie en Christa het hom begin slaan en skop. Hy het haar weer probeer skiet en die wapen het ‘n tweede keer nie afgegaan nie. Terwyl hy met die wapen gesukkel het, het sy hom hard tussen die bene geskop. Die mans het weggehardloop. Christa sterk in die Life Suikerbosrand Kliniek aan. Sy is erg gekneus en het harsingskudding opgedoen.
